ՀՀ կառավարությունը նախատեսում է փոփոխություններ կատարել ինքնակամ կառույցների հաշվառման գործընթացում՝ օգտագործելով 2021 թվականին իրականացված օդային լուսանկարահանման տվյալները։ Այս մասին հայտնում է Կադաստրի կոմիտեի նախագահ Սուրեն Թովմասյանը՝ ներկայացնելով ԱԺ-ում քննարկման համար նախագծված օրենքը։
Փոփոխությունների անհրաժեշտությունը պայմանավորված է այն հանգամանքով, որ 2021 թվականին ընդունված օրենքի համաձայն՝ օրենքն ուժի մեջ մտնելուց հետո կառուցված ինքնակամ շինությունները կորցրել են օրինականացման հնարավորությունը։ Սակայն, ինչպես նշում է Սուրեն Թովմասյանը, բնակչության մի մասը տարբեր պատճառներով չի հասցրել հաշվառել իր կառույցները, ինչի հետևանքով ստացվել են բազմաթիվ դիմում-բողոքներ։
Նոր կարգավորումը կառաջնորդվում է այն սկզբունքով, որ ինքնակամ շինության առկայությունը կհաստատվի 2021 թվականի իրավիճակը արձանագրող օդային լուսանկարի (օրթոֆոտոլուսանկար) միջոցով։ Կադաստրի կոմիտեի ղեկավարը նշում է․ «Նկարին նայելով՝ փաստացի տեսնում ենք այդտեղ կա՞ շինություն, թե՝ ոչ»։
Այսպիսով, օդային լուսանկարի վրա կառուցման տարեթիվը հաստատող ինքնակամ շինությունների կառուցապատողները կունենան մեկ տարվա ընթացքում հաշվառման համար կրկին դիմելու հնարավորություն։
Հատկապես բարդ իրավիճակներում, օրինակ՝ բազմաբնակարան շենքերի ներսում գտնվող ինքնակամ հատվածների պարագայում, որոնք օդային լուսանկարում հնարավոր չէ նշմարել, կպահանջվեն լրացուցիչ տվյալներ՝ չափագրողների կողմից ներկայացվող համապատասխան հաշվառումների միջոցով։
Ըստ Կադաստրի կոմիտեի տվյալների՝ նոր կարգավորումը կտարածվի մոտավորապես 70.000 ինքնակամ շինության վրա։ Սուրեն Թովմասյանը կոչ է անում քաղաքացիներին օրենքն ընդունվելուց հետո հաշվառման համար անմիջապես դիմել որակավորված մասնագետներին՝ խուսափելով վերջնաժամկետի ավարտին առաջացող ճնշումից։
ԱԺ-ում քննարկումը նաև ընդգրկել է որակավորված չափագրողների թվի, կադաստրային քարտեզի պատճառով առաջացած խնդիրների և ինքնակամ շինությունների հաշվառման գործընթացի այլ կողմեր։ Կարևորվել է քաղաքացիների իրազեկումն այս կարևոր օրենսդրական փոփոխության և դրա իրագործման մասին։
About the Author
