Գեղարքունիքի մարզի խոշորացված համայնքներում տոնական լուսավորության և զարդարանքների համար նախատեսված ծախսերը, որոնք կատարվում են «հերոս հարկատուների» հաշվին, հասնում են միլիարդների։
Վարդենիս համայնքը, որը նախորդ տարի այս նպատակով 12 միլիոն դրամ էր ծախսել, այս տարի պայմանագիր է կնքել «Նարեկ Դավթյան Էդվարդի» ԱՁ-ի հետ՝ 15 միլիոն դրամի գումարով։ Այս գումարը նախատեսված է համայնքի կենտրոնական հրապարակը և հարակից 10 գյուղերը տոնական լույսով և զարդերով հագեցնելու համար։ Ըստ համայնքապետարանի՝ աշխատանքները մոտենում են ավարտին, և Վարդենիսը կլինի մարզի ամենահանդերձավոր համայնքներից մեկը։ Նոր պայմանագրի անհրաժեշտությունը առաջացել է այն պատճառով, որ ծառայության մեջ գտնվող լույսերի մի մասը արդեն պիտանի չէր, իսկ նորից հայտարարել են՝ նաև փողոցների և գյուղերի ավելի լայն զարդարման պատճառով։
Մարտունի համայնքը տոնական տեսքի համար ծախսելու է 8 միլիոն 330 հազար դրամ։ Այս գումարը նախատեսված է կենտրոնական հրապարակը և համայնքապետարանի շենքը զարդարելու համար։ Բացի այդ, համայնքապետարանը լրացուցիչ մրցույթ է հայտարարել 8 միլիոն 976 հազար դրամով՝ 15 վարչական համայնքների համար 15 հատ 5 մետրանոց տոնածառներ և զարդարանքներ ձեռք բերելու նպատակով։ Մրցույթի վերջնաժամկետը դեկտեմբերի 15-ն է։
Ճամբարակ համայնքը տոնածառի տեղադրման, զարդարման և հարակից համայնքների զարդարման ծառայությունների համար պայմանագիր է կնքել «Արշակ Արամյան» ԱՁ-ի հետ՝ 12 միլիոն 980 հազար դրամի արժեքով։
Սեւան համայնքը տոնածառի տեղադրման և զարդարման ծառայությունների համար պայմանագիր է կնքել «Ռիկոլ-Էդգա» ՍՊԸ-ի հետ՝ 3 միլիոն 200 հազար դրամ արժողությամբ։ Ըստ համայնքապետարանի՝ այս տարվա արժեքը մի փոքր ավելացել է, քանի որ զարդարվելու են նաև բանուկ փողոցները, իսկ տոնածառն էլ ավելի ներկայանալի տեսք կունենա։
Ինչպես տեղեկացնում է Գավառ համայնքապետարանը, այս պահին ընթանում են եղեւնու տեղադրման աշխատանքները՝ «Գավառի կոմունալ սպասարկում և բարեկարգում» հիմնարկի աշխատակիցների կողմից։ Լույսերի և խաղալիքների ձեռքբերումը կկատարվի մեկ աղբյուրից, քանի որ գնումների բազային միավորը չի գերազանցում 1 մլն դրամը։ Ըստ անհրաժեշտ զարդարանքների տեսակների և քանակների՝ առաջիկայում կկնքվեն համապատասխան պայմանագրեր։
About the Author
